Биыл елге шетелден 566,5 мың адам саяхаттаған
Туризм және спорт министрлігі Қазақстанға биыл келген туристер саны бойынша ТОП-5 елді ұсынды, деп хабарлайды Halyq Uni.
Ұлттық статистика бюросының дерегіне сәйкес, 2024 жылдың қаңтар-маусым аралығында елімізге 566,5 мың шетелдік турист саяхаттап келген. Бұл 2023 жылғы сәйкес кезеңмен салыстырғанда 50,7 мың адамға көп. 2023 жылдың алғашқы жартыжылдығында Қазақстанға 515,8 мың шетелдік турист келген.
Статистика бойынша елімізге келетін шетелдік туристердің географиясы жыл сайын кеңейіп келеді. Мысалы, жақын көрші мемлекеттерден бөлек Қазақстанға мұхиттың арғы бетіндегі елдерден де саяхатшылар келе бастады.
Бұл ретте министрлік 2024 жылдың бірінші жартыжылдығында елімізге келген туристер саны бойынша ТОП-5 елді ұсынды.
2024 жылдың алғашқы 6 айында елімізге ең көп саяхатшы Ресей Федерациясынан келген. Былтырғы қаңтар-маусым аралығында Қазақстанға 186,1 мың ресейлік саяхаттаған. Екінші орынды Қытай туристері иеленді. Шығыстағы көрші мемлекеттен елімізге 69 мың 918 адам келген. Ал үшінші сатыға Үндістан (53 695 адам) жайғасты. Сондай-ақ үздік бестіктің қатарында Түркия (30 312) және АҚШ (19 597) елдері бар.
Елімізге Үндістан, Түркия және АҚШ сияқты елдерден келетін туристер санының артуы Қазақстанның әлемдік туристік картада жыл өткен сайын тартымды бағытқа айналып жатқанын көрсетеді. Біз туристік инфрақұрылымды дамытуды және әлемнің түкпір-түкпірінен келген саяхатшылар үшін қолайлы жағдай жасауды жалғастырамыз, – деді Туризм индустриясы комитетінің төрағасы Нұртас Кәріпбаев.