Ауылдың 40-қа жуық тұрғыны жиналып, күдіктінің үйіне барған. Оларды 29 жастағы бұрынғы мұғалімнің анасы күтіп алды, деп хабарлайды Halyq Uni.

Үй маңына ауыл ақсақалдарымен бірге полиция, ауыл әкімі, барлық жауаптылар жиналған.

Ауылдан дереу кетіңдер! Үйлеріңді сатасыңдар ма, тастап кетесіңдер ме, шаруам жоқ. Бүкіл ағаштағы жемістеріңе дейін жинап алыңдар. 2 апта уақыт береміз. Кетпейді екенсіңдер, өзім аямаймын, - деді жасы 70-ке жақындаған Керегетас тұрғыны.

Жиналғандар арасында марқұм әйелдің тұрмыстағы қызы да болды. Ол әкім мен полицияға өз уәжін айтты.

Жедел жәрдем 1,5 сағатта жетті. Учаскелік полицияны ауылдықтар танымайды да. Барлығы жұмыстарынан кетсін! Ешкім жұмыс істеп жатқан жоқ. Сол үшін де ауылда осындай бассыздық болды, - деп айқайлады әйел.

Ал анасы мен қызын түн ортасында ұйықтап жатқан жерлерінде бастарынан кірпішпен ұрып өлтірген күдіктінің анасы елден сабыр сақтауды сұрап, алдағы екі аптада үйін босатып, басқа жаққа кетуге уәде берді.