Оның айтуынша, елорда, Алматы, Шымкент қалаларында және Атырау облысында коронавируспен науқастану күрт өсіп, олар «қызыл аймаққа» өткен. Ал алты өңір «сары аймақта» тұр.

Біздің негізгі міндетіміз – эпидемиологиялық ахуалды бақылауда ұстау. Халықтың санитариялық-эпидемиологиялық талаптарды сақтауы бойынша шараларды күшейту қажет. Денсаулық сақтау министрлігі, әкімдіктер ПТР-тестілеу санын ұлғайтсын, жедел мониторинг жүргізіп, медицина қызметкерлері мен ауруханаларда резервтік орындардың даярлығын қамтамасыз етсін. Дәрі-дәрмек пен медициналық бұйымдардың жеткілікті болуын қадағалау қажет. Үйде медициналық көмек көрсету үшін мобильді бригадалардың жұмысын жандандырып, оларды тегін дәрі-дәрмекпен қамтамасыз ету керек. Дәріханаларда дәрі-дәрмектің тапшылығына жол бермеу шараларын қабылдау қажет, – деді премьер-министр.

Смайыловтың мәліметінше, ревакцинация жасау қарқыны да өте төмен. Сондықтан ол Денсаулық сақтау министрлігі мен әкімдіктерге халыққа ревакцинация жасау қарқынын барынша арттыруды тапсырды.

Әкімдер бұл мәселені жеке бақылауға алуы тиіс. Ералы Лұқпанұлы, жалпы бақылау сізге жүктеледі. Сонымен қатар орайлы сәтті пайдаланып, барлық медицина қызметкеріне шынайы алғысымды айтқым келеді. Ел үшін сын сағатта олар зардап шеккендер мен жараланғандарға тәулік бойы көмек көрсетіп жатыр. Медиктер, ауруханалар мен жедел жәрдем машиналары лаңкестердің шабуылына да ұшырады. Құрметті медицина қызметкерлері, сіздерге еңбектеріңіз бен батылдық танытқандарыңыз үшін, кез келген жағдайда халыққа көмек көрсетуге әзірліктеріңіз үшін алғыс айтамыз!, - деді үкімет басшысы.

Бұған дейін премьер «халық біздің жұмысымыздан нақты нәтиже күтеді» деген болатын.