Блогерлер жеке кәсіпкер ретінде тіркелуі керек және жарнамаларын таңбалау қажет
Қазақстанда «фейк» ақпарат таратқаны үшін блогерлерге айыппұл салына бастады, деп хабарлайды Halyq Uni Ranking.kz-ке сілтеме жасап.
Қыркүйек айының басында «Онлайн-платформалар және онлайн-жарнама туралы» жаңа заңның күшіне енгеніне бір жыл болды. Заңның негізгі жаңалығы – барлық онлайн-платформа пайдаланушыларын жалған ақпарат таратқаны үшін әкімшілік жауапкершілікке тарту.
Бас прокуратура Құқықтық статистика және арнайы есепке алу жөніндегі комитетінің (БП ҚСжАЕК) есептерінен алынған деректерге сәйкес, биыл қаңтар-шілде айларында ӘҚБтК-нің 456-2-бабы бойынша («Жалған ақпаратты орналастыру, тарату») 77 әкімшілік құқықбұзушылық фактісі тіркелген.
Тіркелген құқықбұзушылықтардың көп бөлігін (67) онлайн-платформа пайдаланушылары жасаған. Олар жаңалықтарға комментарий ретінде немесе посттарында қоғамдық тәртіпті, азаматтардың құқығы мен заңды мүддесін бұзатын ақпаратты орналастырған.
Блогерлер таратқан «фейктерге» тоқталсақ, 5 құқықбұзушылық тіркелді, 2 адам жауапқа тартылды, - деп жазды портал.
Тіркелген құқықбұзушылықтардың жартысынан азын (30) уәкілетті орган (Мәдениет және ақпарат министрлігі) қарады, тағы 38-і сотқа жетті. 50 адам жауапкершілікке тартылды. Олар айыппұл төлейді.
Осы бап бойынша 7 ай ішінде өндіріп алынған қаражаттың жалпы сомасы 2,8 млн теңге болды. Әзірге тек 63,2%-ы өндірілді.
Айта кетсек, әлеуметтік желілерде жалған ақпарат таратқаны үшін немесе «фейк» аралас комментарий жазғаны үшін төленетін айыппұл сомасы отбасы бюджетіне айтарлықтай салмақ салады: 20 АЕК немесе 73,8 мың теңге.
ӘҚБтК бойынша блогерлер үшін айыппұл мөлшері сәл жоғары: 30 АЕК немесе 110,8 мың теңге.
Қаңтар-шілде айларында қазақстандық инфлюэнсерлерге жалған ақпарат таратқаны үшін 166,1 мың теңге айыппұл салынды. Оның 55,4 мың теңгесі өндіріп алынды.
«Онлайн-платформалар және онлайн-жарнама туралы» заңдағы тағы бір маңызды жаңа талап – блогерлер жеке кәсіпкер ретінде тіркелуі керек және жарнамаларын таңбалау қажет.
Сарапшылардың, медиа заңгерлердің пікірінше, жауапкершіліктің енгізілуі болашақта инфлюэнсерлерді әртүрлі қаржы пирамидалары, кибербуллинг және т.б. туралы тексерілмеген ақпаратты жарияламауға мәжбүр етеді.