×

Сотта ақталып шыққан адамдар саны 7 есеге көбейді

Соңғы 4 жылда 160-тан астам азамат кінәсіз деп танылған

 Дастан Жұмабекұлы 10.06.2022 | 17:25
фото: ашық дереккөз

Жоғарғы Сот төрағасы Жақып Асанов Мемлекет басшысы Қасым-Жомарт Тоқаевқа сот жүйесінің қазіргі даму барысы туралы баяндады.

Бұл туралы Ақорда хабарлады.

Кездесуде ол Президентке азаматтық дауларды сотқа жеткізбей шешу мәселесі жөнінде айтып, соңғы 3 жылда Жоғарғы Соттың осы бағытта жүзеге асырған жобалары жайлы мәлімет берді. Оның айтуынша, бұрын істердің тек 2-3 пайызы ғана татуласумен аяқталса, қазір бұл көрсеткіш 37 пайызға жеткен.

Жоғарғы Сот төрағасының деректеріне сәйкес, 2018 жылға дейін ауыр және аса ауыр қылмыстар бойынша бір жылда орта есеппен 23 адам ақталса, соңғы 4 жылда 160-тан астам азамат кінәсіз деп танылған. Яғни, көрсеткіш 7 есеге артқан.

Президентке мемлекеттік басқару жүйесіндегі әкімшілік юстиция туралы айтылды. Жақып Асановтың айтуынша, былтырғы 1 шілдеге дейін азаматтар мен кәсіпкерлер қаралған істердің 85 пайызы бойынша мемлекеттік органдардан жеңілетін. Қазір істердің 55 пайызы кәсіпкерлер мен азаматтардың пайдасына шешіледі.

Сонымен қатар кездесуде сот кадрларының сапасын жақсарту, азаматтардың сотта қорғалуын күшейту, сот ісін жүргізуді оңтайландыру және басқа да міндеттер туралы айтылды.

Серіктес жаңалықтары

Сараптама