«Ақ жол» партиясының басшысы Азат Перуашев депутат Асқар Садықовты партиядан шығаруға қатысты маңызды мәлімдеме жасады, деп хабарлайды Halyq Uni.

Депутаттың партиядан шығарылуы пленумда қаралған шағымдар негізінде қабылданған. Мұның басты себебі ретінде оның өкілеттігін асыра пайдалануы және этикалық нормаларды бұзуы себеп болып отыр.

Партия жетекшісінің айтуынша, Асқар Садықовтың Парламентте жұмыс істейтін бір әйелге бірнеше рет ұятсыз ұсыныс жасап, қысым көрсеткені туралы арыз түскен. Арызданушы 17 сәуірде оның қорлаған ұсыныстарына жауап бермегенін, 15 мамырда бұл әрекеттер қайталанғанын алға тартқан. Оның айтуынша, экс-депутат бірнеше рет жыныстық бопсалауға барған. Алайда оның депутаттық қол сұғылмаушылығы салдарынан жәбірленуші құқық қорғау органдарына жүгіне алмаған.

Партия жетекшісі осындай заңсыз әрекеттерге жол берілмейтінін айтып, ескерту жасағаннан кейін Асқар Садықов өзіне депутаттық мәртебе берілгенін және «кімге не қаласа, соны айтуға құқылы» екенін мәлімдеген. Бұл жағдай пленумның Садықовты депутаттық мәртебесінен айыру және партиядан шығару туралы шешім қабылдауына себеп болған. Осы шешім жәбірленушінің ар-намысы мен қадыр-қасиетін қорғауға мүмкіндік берді.

Азат Перуашев депутат Асқар Садықовтың теріс әрекеттері туралы басқа да фактілердің бар екенін атап өтті. Олардың кейбіреуі құқық қорғау органдарының да назарын аударуы мүмкін. Партия қажет болған жағдайда оларға құқықтық көмек көрсетуге дайын екендігін білдірді.

Жағдайдың айқындылығын қамтамасыз ету үшін партия басшысы Асқар Садықовтың іс-әрекеттері туралы ақпаратты көпшілікке жариялауға мәжбүр болғанын атап өтті. Ол экс-депутаттың өзін 1937 жылғы репрессия құрбандарымен салыстырып, «шындық үшін жазым болғандай» көрсетуіне байланысты үнсіз қалуға болмайтынын түсіндірді.

Осылайша, қоғамда тараған қауесет пен алып-қашпа әңгімелерге нүкте қою мақсатында партия бұл мәселеге қатысты нақты фактілерді жария етуге мәжбүр болған.