Елордада жас ақын-жазушылар арасында аймақтық шығармашылық конкурс өтеді, деп хабарлайды Halyq Uni.

Өңірлердегі жас таланттарды қолдауды, шығармашылығын насихаттауды мақсат ететін байқау негізгі үш номинация – «Поэзия», «Проза» және «Балаларға арналған шығарма» бойынша өтеді, деп мәлімдеді AMANAT партиясының Астана қалалық филиалы.

Шығармалар 2024 жылы 19 тамыз күні сағат 9.00-ден 20 қазан күні сағат 18.00-ге дейін қабылданады. Конкурсқа түскен жұмыстарды байқау комиссиясы 2024 жылы 21-27 қазан аралығында қарап, 2024 жылдың 31 қазанына дейін жеңімпаздарды марапаттау рәсімін өткізеді, – деп қосты ведомство.

Байқауға 18-ден 45 жасқа дейінгі авторлар қатысуға құқылы. Бір автор тек бір номинацияға қатыса алады. Конкурсқа қазақ тіліндегі жұмыстар ғана қабылданады. Байқауға Бердібек Соқпақбаевтың 100 жылдық мерейтойына, «Еңбек адамына», еркін тақырыпқа арналған шығармалар қабылданады.

Конкурс ұйымдастырушысы – AMANAT партиясының елордалық филиалы. Оның ереже-талаптары бекітілген.