Өскеменде қызметтік иттер сайысқа түсіп, үздіктер анықталды, деп хабарлайды Halyq Uni тілшісі.

Жарысқа Өскемен, Семей және Павлодар, Курчатов қалаларынан келген 7 әскери бөлімнің ең мықты кинолог-мамандары қызметтік иттермен қатысты. Сайыс талабы бойынша кинолог итімен спорт залда, жеңіл және жүк көліктерінде жасырынған есірткі, қару, жарылғыш заттарды табуы керек.

Ұлттық ұлан «Шығыс» өңірлік қолбасшылығының кинология қызметінің басшысы Алтынсары Ажыбаев жарыс жыл сайын өтетінін атап өтті.

Биыл жарыс Өскемендегі №6699 әскери бөлімінің базасында өтті. Жарыс 5 күн созылды. Нәтижесінде біз мықты кинолог пен қызметтік итті анықтадық, - деді басшы.

Кинолог Мерхат Қасымхановтың Шара атты қызметтік иті жарылғыш заттарды іздеуге машықтанған. Осыған дейін ол бірқатар сайысқа қатысып, жүлделі орындарға ие болыпты.

Жарылғыш заттарды ізбеу бойынша жаңа 27 ережені орындадық. Итіме өте риза болдым. Жақсы нәтиже көрсеттік. Қызметтік итіммен жаттығым жүргеніме 4 жыл болды. Осы уақытта 2 жүлделі орынға ие болдық, -деді Өскемендегі мемлекеттік маңызды нысандарды күзететін №3477 әскери бөлімі Кинология қызметі мамандар тобының бөлініс басшысы Мерхат Қасымханов.

Сайыстың қорытысындысы бойынша жалпы командалық есепте №5511 әскери бөлімінің (Семей) кинолог мамандары жеңімпаз атанды. Екінші орынды №3514 әскери бөлімінің (Курчатов) кинологтары иеленсе, үшінші орынды №5518 әскери бөлімінің (Өскемен) кинологтары қанағат тұтты.