Алқабилер ақтап шыққан Кәрім Көкірекбаев сот залынан қайта қамауға алынды
Көкірекбаев 2013-2018 жылдары Жамбыл облысын басқарған
![](https://halyq-uni.kz/cache/imagine/1200/uploads/news/2024/07/26/66aa1d8fb250e428432079.jpeg)
Алқабилер ақтап шыққан Жамбыл облысының бұрынғы әкімі Кәрім Көкірекбаев қайта қамауға алынды. Бұл туралы қылмыстық іс материалдарында көрсетілген, деп хабарлайды Halyq Uni.
2022 жылы Сыбайлас жемқорлыққа қарсы іс-қимыл агенттігі Жамбыл облысының бұрынғы әкімі және «Қазселқорғау» мемлекеттік мекемесінің басшысы Кәрім Көкірекбаевтың ұсталғанын хабарлады.
Ол топ болып аса ірі мөлшерде бірнеше рет пара алды деп айыпталған. 2024 жылдың 7 маусымында Алматы облысының қылмыстық істер жөніндегі мамандандырылған ауданаралық соты алқабилердің қатысуымен Көкірекбаевқа қатысты ақтау үкімін шығарды.
Содан кейін Бас прокуратура Көкірекбаевтың ісі бойынша үкімге наразылық білдіретінін жеткізді.
25 шілдеде Алматы облысының қылмыстық істер бойынша сот алқасы Көкірекбаевқа қатысты істі апелляциялық сатыда қарады.
Алматы облысы қылмыстық істер жөніндегі мамандандырылған ауданаралық соты 2024 жылдың 7 маусымдағы алқабилердің қатысуымен Кәрім Көкірекбаевқа, Әділ Ахатаевқа, Андрей Поплавскийға шыққан үкімнің күші жойылсын. Қылмыстық іс басты сот талқылауын өткізу үшін іс қаралған сотқа жолдансын, - делінген іс материалдарында.
Кәрім Көкірекбаев сот залынан қамауға алынды.
Қаулы жарияланған сәттен бастап күшіне енді.