Әл-Фараби атындағы Қазақ ұлттық университетінің археологтары ежелгі қоныстарды анықтады, деп хабарлайды Halyq Uni.

ҚазҰУ археологтары Алматы облысы аумағындағы сақ-үйсін кезеңіндегі елді мекендерді зерттеп, ежелгі қоныстардағы бірнеше тұрғын үйдің орнын анықтады, деп мәлімдеді Ғылым және жоғары білім министрлігі.

Ғылыми-зерттеу экспедициясы Ғылым және жоғары білім министрлігінің Ғылым комитеті ұсынған «Қазақстанның оңтүстік-шығыс пен шығыс аймақтарының (Шу-Іле ауданы, Тарбағатай мен Алакөл алабы) мәдени мұрасын пәнаралық (археологиялық және тарихи-этнографиялық) зерттеу» жобасы аясында іске асырылды, – деп толықтырды ведомство.

Жоба жетекшісі – PhD доктор Ринат Жұматаев. Сонымен қатар АҚШ археолог-ғалымы, профессор Клаудиа Чангтың (Claudia Chang) жетекшілігімен Белбұлақ қонысы зерттелді. Қоныс үйсін дәуіріне жатады. Биылғы далалық маусымда анықталған тұрғын үйлердің орындарын зерттеу нәтижесінде керамика сынықтары мен әртүрлі жануарлардың сүйектері табылды. Пәнаралық зерттеу үшін арнайы сынама-үлгілер алынды. Зерттеуге университет оқытушылары, ғылыми қызметкерлер, докторанттар, магистранттар және студенттер қатысты. Бұл қонысты зерттеу келесі далалық маусымда да жалғасады.

Бұл халықаралық зерттеулер тарих факультетінің жазғы дала мектептерінде дәріс оқуға әрі ғылыми зерттеулерге қатысуға шетелдік ғалымдарды тарту бағдарламасы аясында 2024 жылдың 24 маусымы мен 10 шілдесі аралығында жүзеге асырылды.