Қазақстан оқушылары биологиядан халықаралық олимпиадада жоғары нәтиже көрсетті
International Biology Olympiad – оқушылар арасындағы ең мықты 7 олимпиаданың бірі
![](https://halyq-uni.kz/cache/imagine/1200/uploads/news/2024/07/14/66939f8258c21071487117.jpg)
Қазақстандық құрама IBO-2024 олимпиадасында 100% нәтиже көрсетті, деп хабарлайды Halyq Uni тілшісі.
Астанада биологиядан оқушылар арасындағы ең беделді халықаралық олимпиада IBO-2024 өз мәресіне жетті. Бірінші рет IBO осыдан 34 жыл бұрын алты елдің қатысуымен өткен болатын. Биылғы жылы Қазақстанда өткен олимпиадаға 81 мемлекеттен командалар жиналды. Бүгін олимпиаданың ресми жабылу салтанаты өтті, деп мәлімдеді Оқу-ағарту министрлігі.
Оқу-ағарту министрі Ғани Бейсембаев барлық қатысушыға және халықаралық ұйымдастыру комитетіне алғысын білдірді. Ол олимпиаданың жалпы білім саласының дамуы үшін қаншалықты маңызды екенін атап өтті.
IBO-2024 – білімнің бәсекелестік алаңы ғана емес, ол ғылым саласында мемлекеттердің достығы мен ынтымақтастығын тереңдетуге ықпал ететін халықаралық маңызды шара. Қазақстанда өткізген әрбір күн сіздерге жарқын естелік сыйлап, алдағы уақытта ғылымның жаңа биік белестерін бағындыруға шабыт береді деп ойлаймын. Болашақта сіздер орасан зор ғылыми жаңалықтар ашып, әлемнің ұлы ғалымдарының даңқты жолын жалғастырасыздар деп сенемін, – деді Ғани Бейсембаев.
Атап өту керек, олимпиада қорытындысы бойынша Халықаралық комитеттің инпекторлары мен әділ қазылар IBO-2024 олимпиадасының ұйымдастырылуына жоғары баға берді. Сондай-ақ қазақстандық жас ғалымдар әзірлеген олимпиада тапсырмаларының өзектілігі мен өзгешелігін атап көрсетті. Бұл олимпиаданы өткізу үшін тынбай еңбек еткен ұйымдастыру комитеті үшін жоғары марапат болды.
Еліміздің құрамасы 100% медаль көрсеткішіне қол жеткізді. Олар 4 қола медаль қанжығалады:
- Ғалымжан Бақтыбай – Астана қаласы дарынды ер балаларға арналған «Білім-Инновация» лицей-интернатының 11 сынып оқушысы;
- Амина Тынырбай – Қызылорда облысы №10 дарынды балаларға арналған «Білім-Инновация» лицей-интернатының 11 сынып оқушысы;
- Нұртөре Төреханұлы – Шығыс Қазақстан облысы дарынды балаларға арналған «Білім-Инновация» мамандандырылған лицейінің 11 сынып оқушысы;
- Диас Сүлейменов – Ақтөбе облысы «Білім- Инновация» лицей-интернатының 11 сынып оқушысы.
Қазақстан командасының жетекшілері: Бауыржан Смайлов – биотехнология магистрі, IBO-2007 олимпиадасының күміс жүлдегері; Ернар Батыржанов – Ульсан ғылым және технология ұлттық институтының студенті (UNIST, Корея), биологиядан халықаралық және республикалық олимпиадалардың жеңімпазы.
International Biology Olympiad – оқушылар арасындағы ең мықты 7 олимпиаданың бірі.
Олимпиада күндері Қазақстан 81 елден келген 305 жас биолог пен 275 ғалымның тәжірибе алмасу алаңына айналды. Бір апта бойы қатысушылар биохимия, молекулярлық биология, биоинформатика және жан-жануарлардың анатомиясы мен физиологиясы бойынша екі теориялық, төрт практикалық турда сынға түсті. Барлық тапсырманы Қазақстанның жас биологтары әзірледі. Қатысушылар мен қонақтар сондай-ақ елорданың көрікті жерлерін аралады. Бурабайда «Көшпенділер әлемі» этно ауылында болып, қазақ халқының салт-дәстүрімен, мәдениетімен танысты.