Ет сапасын енді QR-код арқылы тексеруге болады
Жүйе бизнес процестерді автоматтандырып, жануар туралы толық ақпарат береді
![](https://halyq-uni.kz/cache/imagine/1200/uploads/news/2024/07/12/6690e2ce492a3884049441.jpg)
Ауыл шаруашылығы министрлігі «Етті ветеринариялық-санитариялық сараптау» модулін әзірледі. Ол ауыл шаруашылығы жануарларын тексеріссіз союға жол бермей, алдымен ветеринариялық тексеруді және союдан кейінгі ветеринариялық-санитариялық сараптаманы өткізіп береді, деп хабарлайды Halyq Uni.
Жүйе малды сою және ішкі сауда орындарында ветеринариялық-санитариялық сараптамадан өткеннен кейін сараптама актісін берудің бизнес-процестерін автоматтандырады. Сондай-ақ жануардың толық өмірлік циклі туралы ақпараты бар QR-кодты қалыптастырады.
Бұл QR ет сату орындарында орналастырылады. Ол малды ветеринарлық тексерусіз және ұшалар мен ағзаларды сараптамасыз союдың алдын алуға мүмкіндік береді, - деп жазылған министрлік хабарламасында.
Министрлік мәліметінше, жоба іске қосылып, барлық облыс пен республикалық маңызы бар қалаларда жұмыс істеп жатыр. Оған 1 664 мал сою орны, ветеринарлық-санитарлық сараптама зертханалары, сауда орындары қосылған. Жүйеде 1 470-тен астам ветеринар, ветеринариялық-санитариялық сараптама зертханасының қызметкері және мемлекеттік ветеринариялық-санитариялық инспекторлар тіркелген.
QR-код арқылы қазірдің өзінде 117 мыңнан астам ветеринариялық анықтама бланкісі мен 438 мың сараптама қорытындысы шығарылған.
Жүйе Ресеймен шекаралас Шарбақты ветеринарлық бақылау пунктінде сынақтан сәтті өткен.