Екібастұзда курьерді тонаған студенттер жазаланды
Олар 80 электронды темекіге тапсырыс берген
![](https://halyq-uni.kz/cache/imagine/1200/uploads/news/2024/07/11/668f298785b53786033047.webp)
Екібастұзда курьерді тонаған студенттердің бас бостандығы шектелді. Қылмыскерлердің бірі колледжде, екіншісі университетте оқиды. Олар ойын клубтарында бірге уақыт өткізген, деп хабарлады pavlodarnews.kz.
Ойын приставкаларында болған кездесулердің бірінде колледждің 4-курс студенті қарызын қайтару үшін шұғыл ақша қажет екенін айтқан. Екі дос WhatsApp арқылы электронды темекіге қолма-қол ақшаға тапсырыс беріп, курьер тауарды жеткізген кезде 22 жастағы студент оған бұрыш спрейін қолдануды жоспарлаған. Ал екіншісі тауарды алып, қылмыс орнынан қашып кетпек болған.
Осылайша, институттың 2-курс студенті курьер арқылы 80 электронды темекіге тапсырыс береді. Төлем қолма-қол көрсетілген. Ол сағат 20:30-да скутермен келген курьерге бұрыш спрейін шашқан. Жас жігіт құлаған уақытта шабуылдаушылар 8 қорап темекіні алып, қашып кеткен. Жалпы алғанда, залал 400 мың теңгеге тең.
Студенттер түнді ойын клубында өткізген. Ал келесі күні таңғы сағат 10-да құқық қорғау органдары айыпталушыларды Екібастұз полиция басқармасына жеткізді.
Сотта айыпталушылар жәбірленушіден кешірім сұрап, өздерін бас бостандығынан айырмауды өтінген. Ұрланған тауар қайтарылды. Ал электронды темекі дүкенінің иесі оларға шағымданбаған.
Сот студенттерге 3 жылға бас бостандығын шектеу түрінде жаза тағайындады.