Қазақстан мен Индонезия мәдениет саласында ынтымақтастық орнатпақ
Екі елдің дипломатиялық қарым-қатынасының орнағанына 30 жылдан асты
![](https://halyq-uni.kz/cache/imagine/1200/uploads/news/2024/07/03/66853e2b763f1841105490.jpg)
Қазақстан мен Индонезия арасындағы мәдени ынтымақтастық перспективалары талқыланды, деп хабарлайды Halyq Uni тілшісі.
Қазақстанның Мәдениет және ақпарат вице-министрі Ербол Әліқұлов Индонезия Білім, мәдениет, зерттеулер және технологиялар министрлігі Мәдениет басқармасының бас директоры Хильмар Фаридпен және Индонезияның ҚР-дағы елшісі Мохамад Фаджрул Рахманмен кездесті, деп мәлімдеді Мәдениет және ақпарат министрлігі.
Ербол Әліқұлов өткен жылы Қазақстан мен Индонезияның дипломатиялық қарым-қатынасына 30 жыл толғанын атап өтті.
Осы уақыт ішінде біздің елдеріміз екіжақты өзара тиімді ынтымақтастық шеңберінде тығыз және сенімді қарым-қатынас орнатты. Қазір біз екі елдің мәдени іс-шараларға қатысуы арқылы бірлескен жұмысты жандандыруымыз қажет, – деді Ербол Әліқұлов.
Қазақстан мен Индонезия арасындағы мәдени ынтымақтастық туралы меморандумға 2013 жылы қол қойылған. Енді серіктестер өзара байланыс аясын кеңейтуге ниетті.
«Қазақстан мен Индонезияның ортақ тұстары көп. Біз – көпұлтты және көпмәдениетті мемлекетпіз. Біздің ынтымақтастығымыз одан да тиімді әрі жемісті болатынына сенімдімін», – деді Хильмар Фарид. Сонымен қатар екі елде де алмасу бойынша оқитын студенттер санын көбейтуді ұсынды.
Жиын соңында қатысушылар бейнелеу және сәндік-қолданбалы өнер, музыка, театр және кинематография саласындағы ынтымақтастықты қарастыруға және нығайтуға дайын екендіктерін атап өтті.