Жамбыл облысында шенеуніктер мемлекетке тиесілі көліктерді сатып жіберген
«Таза Талас» кәсіпорнының директоры мен оның орынбасары 7 жылға сотталды
![](https://halyq-uni.kz/cache/imagine/1200/uploads/news/2024/06/24/66794055e6bb1633002365.jpeg)
Жамбыл облысы Қаратау қаласының тазалығына жауапты мекеме басшылары мемлекетке тиесілі 4 көлікті сатып жіберген.
Almaty.tv-ның хабарлауынша, «Таза Талас» кәсіпорнының директоры мен оның орынбасары алдымен автокөліктерді жарамсыз деп есептен шығарған. Содан кейін тиісті аукцион өткізбестен, көлденең келген сатып алушыға қолма-қол ақшаға сатып жіберген. Ал бұл қызметтік көліктердің нарықтық құны – 6-7 млн теңге. Соның кесірінен мемлекетке 22 млн теңге залал келді. Прокурорлар құны 10 млн теңге болатын 2 көлікті қайтарып, ақшалай 7 млн теңгені мемлекет пайдасына өндірді. Ал бюджет қаржысын талан-таражға салғандар сотталды.
Талас ауданы сотының үкімімен «Таза Талас» кәсіпорнының директоры мен оның орынбасары 7 жыл мерзімге бас бостандығынан айырылды. Әрқайсысына мемлекеттік қызметте лауазымдық қызмет атқаруға өмір бойына тыйым салынды.