Алматыда кезекте тұрған 800-ден астам адам пәтер алды
Бүгін қоныс тойын 2011 жылдан 2012 жылға дейін кезекте тұрғандар атап өтті
![](https://halyq-uni.kz/cache/imagine/1200/uploads/news/2024/06/24/66792ed6afc07779574919.jpeg)
Халықтың әлеуметтік осал топтары санатына жататын, кезекте тұрған 218 адам пәтер кілттерін алды. Барлығы 3 жаңа үйде 78 жетім бала, I және II топтағы 31 мүгедек, жеңілдіктері бойынша ҰОС ардагерлеріне теңестірілген 4 адам, мүгедек балаларды тәрбиелеп отырған 23 отбасы, 72 толық емес отбасы және 10 зейнеткер болды.
Бүгін қоныс тойын 2011 жылдан 2012 жылға дейін кезекте тұрғандар атап өтті. Келесі аптада тұрғын үйдің жаңа шаршы метріне қоныстанудың кезекті кезеңі жоспарланып отыр, – деді Алматы қаласы коммуналдық инфрақұрылымды дамыту басқармасы басшысының орынбасары Ғалымжан Әбдішүкірұлы.
Пәтерлердің кілттерін алу үшін адамдар отбасыларымен, балаларымен және немерелерімен келді. Олардың арасында бір бөлмелі пәтер алған көпбалалы ана Майра Әлібаева да бар.
Мен – 75 жастамын, 11 баланың анасымын. Бұрын қалада ұлымның отбасымен бірге тұрдым. Енді мен өз пәтерімде арбаға таңылған ұлыммен бірге тұрамын. Қала билігіне жаңа шаршы метр үшін өте ризамын, – деді ол.
Еске сала кетсек, ХӘОТ санатындағы кезекте тұрғандарға кілттерді тапсыру биыл 25 мамырда басталған болатын. Содан кейін 3 үйден кезекте тұрған 124 адам пәтер алды. Екінші ағынмен 28 мамырда кезектегі 164 адам қоныстанды. 30 мамырда тағы 105 адам кілттерін алды. 5 маусымда 111 отбасы жаңа үйлерге көшті. 7 маусымда қоныс тойын Медеу сити тұрғын үй кешенінде 86 адам атап өтті.
Айта кетейік, Алматы қаласының әкімі Ерболат Досаевтың тапсырмасы бойынша 2024 жылы қаланың коммуналдық тұрғын үй қорынан халықтың әлеуметтік осал топтарының тізімі бойынша кезекте тұрған азаматтарға кезектілік тәртібімен 2 мың жалға берілетін пәтер беру жоспарланып отыр. Оның ішінде 400 пәтер жетім балаларға берілетін болады.