Теміртауда жастардан жеңілдетілген ипотека алуға өтінім қабылдана бастады

Теміртауда жұмыс істейтін жастарға тұрғын үй алу үшін жеңілдетілген несие беруге өтініштер қабылдау басталды. Құжаттарды қабылдау 28 маусымға дейін жалғасады, деп хабарлайды Қарағанды облысының әкімдігі.

«Теміртау жастары» тұрғын үй-ипотекалық бағдарламасы былтыр іске қосылған болатын. Бұл – Теміртау қаласы әкімдігі мен «Отбасы банкінің» бірлескен жобасы.

Жоба қалада кемінде 1 жыл тұрған және жұмыс істейтін жас мамандарды қолдауға бағытталған.

Бағдарлама шарттары:

• Қатысушылардың жасы – 35 жасқа дейін;
• Міндетті түрде қарыз алушының және оның отбасы мүшелерінің меншігінде соңғы 5 жыл ішінде жылжымайтын мүлік болмауға тиіс;
• Қарыздың ең жоғары сомасы – 15 млн теңге;
• Үміткерлерде қарыз сомасының кемінде 10% мөлшерінде бастапқы жарнасы болуы керек;
• Бұл ретте тұрғын үйді жылдық 6%-бен ресімдеуге болады;
• Несие мерзімі – 8 жыл.

Бағдарламаға денсаулық сақтау, білім беру, мәдениет, спорт жүйелерінің қызметкерлерінен, БАҚ, өндіріс, ЖОО және әлеуметтік сала өкілдерінен басқа, квазимемлекеттік сектордың коммуналдық кәсіпорындардың, ТЖМ, жолаушылар көлігі кәсіпорындарының, «Оқжетпес-Т» және «Қазпошта» компанияларының қызметкерлері де қатыса алады.

Тұрғын үйді бастапқы және қайталама жылжымайтын мүлік нарығында сатып алуға болады.

Үміткерлер мына құжаттарды ұсынуы керек:

• жеке куәлік;
• азаматтық хал-ахуалды мемлекеттік тіркеу туралы куәлік (неке қию және балалардың туу туралы куәлігі – болған жағдайда);
• өтініш берушіге және отбасының барлық мүшелеріне жылжымайтын мүліктің жоқтығы туралы анықтама;
• ресми бланкіде жұмыс орнынан анықтама (ресми бланкі болмаған жағдайда анықтамада ұйымның мөрі болуға тиіс);
• еңбек өтілін растайтын құжат;
• еңбек қызметінің барлық кезеңі үшін зейнетақы аударымдары туралы үзінді көшірме;
• мүгедектік туралы анықтама (бар болса).

Құжаттарды 28 маусымға дейін Жастар ресурстық орталығына тапсыру қажет.