Киіз үйде түсірілген видеоны ҰҚК тексеруі керек – депутат
Ұлттық құндылықты қорлауға жол беруге болмайды
![](https://halyq-uni.kz/cache/imagine/1200/uploads/news/2024/06/19/66b8b05d51f5c790835861.jpg)
Мәжіліс депутаты Самат Мұсабаев киіз үйде түсірілген видеоны Бас прокуратура мен Ұлттық қауіпсіздік комитеті тексеріп, құқықтық баға беруі керектігін айтты, деп хабарлады Halyq Uni тілшісі.
Депутаттық сауал Бас прокурор Берік Асылов пен Ұлттық қауіпсіздік комитетінің төрағасы Ермек Сағымбаевқа жолданды.
Бабадан қалған ең қастерлі мұрамыздың бірі киіз үй еді. Сан ғасыр бойы хандарымызға еңсесі биік ақ орда, халқымызға құт ұялаған баспана болған сол киіз үйге ақпараттық шабуыл да басталды.
Күні кеше оюланған киіз үйде ұлттық киім киіп, жартылай жалаңаштанып, ойқастаған үшеудің әлеуметтік желіні шарлаған бейнеролигі исі қазақтың ашу-ызасын тудырып отыр. Халықтың бұған наразылығы әбден орынды. Ең аяулы дүниеңді аяққа таптаса, ұлттық киіммен жалаңаштанса, төріңде әуретін ашып тайраңдаса, бұл – бүкіл ұлтты, дені қазақ, рухы биік елімізді қорлаумен пара-пар. Ең сорақысы – әлгі ойнақтаған үш ұзынның ортадағы «сирақты примасы» қызтеке екен. Бұл – халқымызға қарсы мысықтілеулі, теріс ниеттілердің алдын ала жете ойластырып, қазақы дүниені, ұлттық құндылықтарды құнсыздандыруға, мазақ етуге бағытталған қасақана жаулық әрекеті деп білеміз, - деді Самат Мұсабаев.
Оның пікірінше, елімізде ЛГБТ насихатына жол беруге болмайды.
Тал түсте төрімізде тайраңдағаны – нағыз басынғандық. Олар бүгін төрімізде тайраңдаса, ертең төбемізде ойнамасына кім кепіл?! Сондықтан бұған көз жұма қарап, жай қалдыра салуға болмайды. «Албасты қабаққа қарап басады» деген. Бұл, біріншіден, қоғамның осы әрекетке қалай үн қататынын байқайын деген астыртын сыр тарту тәсілі болса, екіншіден, ЛГБТ насихатына тосқауыл қоймақ талапқа деген ашық қарсылық, үшіншіден, өскелең буынды өз ұлттық құндылықтарынан жеріндіру әрекеті. Бұл мәселені біз бір топ депутат былтыр Мәжіліс мінберінен көтеріп, барлық платформаларда, әлеуметтік желілерде ұлттық мәдениетімізге сәйкес келмейтін ақпараттық өнімдерді таратуға тыйым салу, теріс ағымдарды насихаттайтын ақпарат көздерінен сақтайтын заң нормаларын әзірлеуді ұсынғанбыз, - деді депутат.
Сондай-ақ ол ЛБТ-ға қоғам қарсы екенін атап өтті.
«Таяуда қоғам белсенділері E-petition.kz мемлекеттік платформасында ЛГБТ насихатына қарсы петиция жариялаған еді. Небәрі 2 аптада осы талапты қолдап, 50 мың қол жиналды. Бұл – ЛГБТ-ның елімізге қажетсіз әрі жат құбылыс екенін, оған халықтың ашық қарсылығының анық көрінісі. Алда өтетін петиция қорытындысын қарау отырысына қоғам белсенділерін, ұлт жанашырларын белсене қатысуға шақырамын», - деді Самат Мұсабаев.
Депутаттың пікірінше, әлеуметтік желіде тараған видео – ұлттық құндылығымызды қорлау көрінісі, әбден шектен шыққандық.
Сондықтан құқық қорғау органдары бейнеролик кейіпкерлерін, оларды ұйымдастырушыларды, түсіру тобын, идея авторларын тауып, заңға сәйкес қатаң жазалау қажет деп санаймыз. Бұдан былай ұлттық құндылықтарымыз – домбыра, қобыз, киіз үй, ұлттық киім, ұлттық тағам секілді асыл жәдігерлерімізді қандай да теріс мақсатта пайдалану, мазақ ету, ұлт намысына қол сұғу ұлттың беделін түсіруге бағытталған қылмыстық әрекет деп бағаланып, қылмыстық жауаптылықпен жазалануға тиіс, - деді ол.
Самат Мұсабаев киіз үйде түсірілген видеоны ҰҚК тексеру керектігін атап өтті.
«Бас прокуратурадан, Ұлттық Қауіпсіздік комитетінен аталған бейнеролик бойынша құқықтық баға беріп, оған қатысты нақты шара қолдануды сұраймыз. Ата дәстүрімізге қол сұғу – ұлттық қауіпсіздігімізге нұқсан келтіру, ұлттық құндылықтарды түбірімен жоюмен тепе-тең. Қазақ – домбыра, қазақ – ұлттық дәстүр, қазақ – киіз үй, ою, ұлттық киім. Осының әрбіріне жасалған қастандық біз үшін ауыр қылмыспен тең», - деді депутат.