АШМ аумақтық ветеринариялық инспекциясының басшысы жауапқа тартылды
Прокуратура мемлекеттік қызмет істері агенттігінің департаментіне қадағалау актісін енгізді
![](https://halyq-uni.kz/cache/imagine/1200/uploads/news/2024/06/17/66b4d2b206614663267472.jpg)
Алматы прокуратурасының қадағалау актісі бойынша Ауыл шаруашылығы министрлігі аумақтық ветинспекциясының басшысы жауапкершілікке тартылды, деп хабарлады Halyq Uni тілшісі.
Медеу ауданы прокуратурасының мәліметінше, АШМ Ветеринарлық бақылау және қадағалау комитеті Алматы қаласы бойынша аумақтық инспекциясының басшысы мемлекеттік орган ғимаратына іргелес жатқан жер учаскесін қоғамдық тамақтану нысаны үшін заңсыз берген.
Осыған байланысты прокуратура Алматы қаласы бойынша мемлекеттік қызмет істері агенттігінің департаментіне прокурорлық қадағалау актісін енгізді.
Әдеп жөніндегі кеңестің ұсынымы бойынша АШМ Ветеринариялық бақылау және қадағалау комитетінің бұйрығымен мемлекеттік қызметке кір келтіретін, кәсіпкерге кіріс әкелуде заңсыз жәрдем көрсетуді білдіретін теріс қылық жасағаны үшін («Қазақстан Республикасының Мемлекеттік қызметі туралы» ҚР заңының 50-бабы 1-бөлігінің 5-тармақшасы) аумақтық инспекция басшысы «қызметке толық сәйкес еместігі туралы ескерту» түріндегі тәртіптік жауапкершілікке тартылды, – делінген прокуратура хабарламасында.