×

Қазақстанда балалар қандай кітаптарды оқығанды ұнатады

Жас оқырмандардың сүйікті әдебиетінің тізімі жарияланды

 Қымбат Елтайқызы 01.06.2024 | 15:01
фото: pavlodarnews.kz

Еліміздегі жас оқырмандар фантастика, комикстер мен көркем әдебиет оқығанды ұнатады, деп хабарлайды Halyq Uni тілшісі.

Балаларды қорғау күніне орай, Мәдениет және ақпарат министрлігі 249 балалар кітапханасы арасында оқырмандар сұранысы бойынша талдау жүргізді. Биыл жас оқырмандар саны 1 733 686 адамға жетіпті. Сауалнама нәтижесі бойынша, балалардың кітапханаларға деген қызығушылығы артып келеді. Олар әсіресе фантастика, комикстер мен көркем әдебиет оқығанды ұнатады.

Ең көп оқылатын кітаптар Бердібек Соқпақбаевтың «Балалық шаққа саяхат», «Менің атым Қожа», Саин Мұратбековтің «Жабайлы алма», Жоан Роулиңнің «Хәрри Поттер» және Марк Твеннің «Том Сойер» шығармалары болды.  Баянғали Әлімжанов, Толымбек Әбдірайым, Зира Наурызбаева, Серікбол Хасан, Зауре Төрехан және тағы басқа авторлардың шығармаларын балалар қызығушылықпен оқыған, – дейді ведомство.

Балалар сүйіп оқитын басылымның бірі – комикстер. Жас оқырмандар Ұларбек Нұрғалымұлының «Ілияс пен Заңғардың планшеті», Оразхан Жақыптың «Еркетай», Ілияс Юсуфтың «Керей мен Жәнібек» шығармаларын, сондай-ақ Майк Барфилдтің «Комикстегі әлем тарихы», «Комикстегі жаратылыстану» аудармасын ұнатады. Қазақ ертегілері мен әлем халықтарының ертегілері бойынша «Қазақ және әлем халқының ертегілері», «Авторлық ертегілер», «Алатау ертегілері» «Таңдаулы ертегілер», Чарльз Перро мен Ағайынды Гриммдердің ертегілері көп сұралады.

Айта кетейік, Қазақстандағы балалар кітапханаларының қызметі баланы тәрбиелеуге, білім беруге, ақпараттандыруға және тұлғалық дамытуға бағытталған.

Тоқаев бүлдіршіндерді Халықаралық балаларды қорғау күнімен құттықтады. Президент Балалар шұғыл медициналық жәрдем орталығына 2 реанимобиль сыйлады.

Серіктес жаңалықтары

Сараптама