Әділет министрінің орынбасары Ботагөз Жақселекова «Алға, Қазақстан» және «Халық дербестігі» атты саяси партияларды тіркеуге рұқсат берілмегенін айтты, деп хабарлады Halyq Uni тілшісі.

«Қазір Қазақстанда 7 саяси партия тіркелген. Бүгінде Әділет министрлігінің қарауында саяси партиялардан түскен қандай да бір өтініш жоқ. Жыл басынан бері министрлікке саяси партияны құру туралы 3 хабарлама түсті. Оның барлығы қаралды. Бір хабарлама бойынша, яғни YNTYMAQ партиясының хабарламасы қолдау тапты. Қалған 2 хабарламаға рұқсат берілмеді. Себебі, олардың құжаттары дұрыс емес. Яғни біз партия бойынша тізімнің сәйкес келмеуіне байланысты «Халық дербестігі», «Алға, Қазақстан» партиясын тіркеуден бас тарттық», - деді Ботагөз Жақселекова Сенат кулуарында.

Айта кетейік, Қазақстанда ресми түрде жеті саяси партия тіркелген:

• «Amanat» партиясы;
• «Ақ Жол» Қазақстанның демократиялық партиясы;
• Қазақстан Халық партиясы;
• «Ауыл» халықтық-демократиялық патриоттық партиясы;
• Жалпыұлттық социал-демократиялық партия;
• «Байтақ» жасылдар партиясы;
• «Respublica» партиясы.