Қазақстанда шамамен 93 мың жас отбасының баласы жоқ, деп хабарлады Ranking.kz.

Батыс елдерінде жастардың ата-ана болудан саналы түрде бас тартуы чайлдфри (ағылшыннан childfree — балалы болмау) деп аталады.

Қазақстанда чайлдфрилер бар ма? Елімізде баласыз жұптардың ата-ана болуға деген көзқарасы бойынша зерттеулер жүргізілмеген. Алайда Қазақстанда ерікті баласыз қалу құбылысының бар екенін мұндай адамдардың көптеген жеке сұхбаттары және әлеуметтік желілерде өз ұстанымдарын білдірулері растайды. Тек анонимді сұхбаттар мен жазбаларда қазақстандықтар саналы түрде бала туып, өсіргісі келмейтінін мойындайды.

Қазақстандағы үй шаруашылықтарының саны мен құрамын егжей-тегжейлі талдау ұлттық халық санағы шеңберінде ғана жүргізіледі. Бұл деректер республикада баласыз қанша ерлі-зайыптылардың тұратыны туралы түсінік бере алады. Соңғы республикалық халық санағында (2021 жылы) Қазақстанда осындай 656,5 мың отбасы болған. 12 жыл ішінде (2009 жылдан бастап) баласыз екі адамнан тұратын нуклеарлы отбасылар 73,8%-ға өсті. 2021 жылы бұл үй шаруашылықтарының көпшілігі қалаларда орналасқан.

Ұлттық статистикалық бюросының мамандары бұл жұптар балалары бар-жоғын, басқа туыстарымен немесе бөлек тұратынын нақтыламай отырғанын айтады. Егжей-тегжейлі деректер тек әйелі немесе күйеуі әлі 30-ға толмаған ерлі-зайыптыларды осындай отбасылардан оқшаулауға мүмкіндік береді. 2021 жылы Қазақстанда мұндай үй шаруашылығы 92,9 мың болды. Бұл алдыңғы ұлттық санақ кезіндегіден 2 есе көп.

Бұл отбасылардағы әйелдердің кейбірі орташа қазақстандық сияқты (25,2 жасында) некеге тұрып, отбасылық өмірдің алғашқы жылдары әлі балалы болмаған деп болжауға болады.

Қазақстандық әйелдердің тұңғышын туған жасына қарағанда 16,8% жағдайда бұл 30 жастан кейін болады.

Сондай-ақ осы жаста кейбір отбасылар бедеуліктің кесірінен ата-ана болу бақытын әлі көрмеген болуы мүмкін.

Ресми мәлімет бойынша, 2021 жылы елімізде медициналық диагнозға байланысты бала туа алмай қалған 21,4 мыңға жуық қазақстандық болған. Мұндай адамдарды әдетте чайлдлесс деп атайды (ағылшыннан childless – баласыз).

Бұған дейін елімізде 20 мыңға жуық отбасы перзент сүйе алмай жүргені хабарланған еді.