Павлодар облысында перзентханадан шыққан нәресте жолда үсіп қала жаздады. Жаңа туған сәбидің анасы лимузинмен аязда жолда тұрып қалған. Осы кезде Кемеңгер ауылының учаскелік инспекторы Қанат Әбілдинов патрульдеу кезінде қар құрсауында қалған лимузинді көріп, көмекке келген.

Облыстық полиция департаментінің мәліметінше, автокөліктің жүргізушісі нәрестені анасымен бірге перзентханадан алып келе жатқанда қалың қарға кептеліп қалғанын айтқан.

Учаскелік инспектор көлікті арқанмен қардан шығарып алып, үйіне дейін апарды.  

Нәресте мен оның анасына ешқандай зақым келмеген. Олар аман-есен үйіне жеткізілді.