Оларға бостандыққа шыққан соң жұмыс табу қиын
Алматыдағы балалар колониясына мансап орталығының мамандары барды, деп хабарлады Polisia.kz.
Алматы қаласы, Алматы және Жетісу облыстары бойынша қылмыстық-атқару жүйесі департаментіне қарасты №11 мекемесіндегі кәмелетке толмаған сотталғандармен қалалық мансап орталығының қызметкерлері кездесті.
Олар жазасын өтеп жатқан жасөспірімдерге 3 айлық оқу, қайтарымсыз грант (кәсіп ашқан жағдайда беріледі) және «Агробизнес» бағдарламасы және тағы басқа мемлекеттік бағдарламалар туралы толық ақпарат берді.
Бүгінде сотталған адамға бостандыққа шыққан соң жұмыс табу – өте өзекті мәселенің бірі. Олар үшін жұмысқа орналасудың маңызы зор. Сондықтан мамандар жасөспірімдерге еркіндікке шыққан соң кәсіби білім алудың маңызын түсіндіріп, қалай жұмысқа орналасуға болатыны туралы кеңестер берді, - деп жазылған хабарламада.