ШҚО-да бірнеше ауыл әлі қар құрсауында жатыр
Ауданда табиғи сипаттағы төтенше жағдай жарияланды
![](https://halyq-uni.kz/cache/imagine/1200/uploads/news/2024/01/22/65ae4f223364e629120596.jpg)
Күршім ауданына қарасты бірнеше ауыл әлі қар құрсауында жатыр, деп хабарлады Altaynews.kz.
Жергілікті тұрғындардың мәліметінше, Төсқайың, Балықтыбұлақ, Бұғымүйіз, Шанағаты жолдары ашылмаған. Салдарынан тебіндегі жылқыларға жем-шөп жетпей жатыр. Осыған байланысты көрші аудандар мен кейбір ауыл көмектесуге кіріскен. Алайда аудан тұрғындары көмекке берілген жем-шөпті тасуға техника жоқ екенін айтады.
Бүгін облыс әкіміне хат жазып, жем-шөп және техника беріп көмектесуін сұрадық. Зайсан, Күршім аудандарынан және ауылдағы жұрт артық жем-шөбін беріп жатыр. Оларды жол ашылған ауылдарға тасуға техника болмай отыр. Қазір Қалжыр ауылынан 60-70 қап жем алып, Қайнарлы және Қарой, Ақжайлау ауылдарына жеткізгелі жатырмыз. Мұның барлығын өзіміз ұйымдастырдық, – деді Қуаныш ауылының белсендісі Қайырхан Қазыбекұлы.