Қазгидромет 2022 жылғы көктемдегі топырақтағы ылғал қоры жайлы ақпарат берді.

15 сәуір мен 12 мамыр аралығында мамандар негізгі астық егетін аймақтарға көктемгі маршруттық тексеру жүргізді. Солайша келесі деректер анықталды: 

• Топырақтың метрлік қабатында негізінен Батыс Қазақстан облысында ылғал жинақтаудың жеткіліксіз жағдайлары қалыптасты;
• Қостанай, Ақмола, Павлодар, Қарағанды, Солтүстік, Шығыс Қазақстан облыстарының кейбір аумақтарында ылғалданудың жеткіліксіз жағдайлары атап өтілді.

Басқа өңірлерде метрлік қабатта негізінен қанағаттанарлық, оңтайлы ылғал қоры болды.

Қазір тамыр жүйесінің дамуы жүріп жатқан топырақтың егістік қабатында (0-20 см) негізінен ылғалдың жеткіліксіз қоры (ең аз далалық ылғал сыйымдылығының 50%-нан төмен) келесі жерлерде қалыптасты:

• Қарағанды облысы;
• Батыс Қазақстан облысының солтүстігі, солтүстік-шығысы;
• Қостанай облысы Денисов, Қарасу, Федоров, Қарабалық аудандарының жекелеген алқаптары;
• Солтүстік Қазақстан облысының Ақжар, Қызылжар, Есіл аудандары, Айыртау, Мүсірепов, Аққайың аудандарының жекелеген алқаптары.

Синоптиктердің болжамынша, мамырдың үшінші онкүндігінде еліміздің батысы мен солтүстігінде жауын-шашын күтіледі. Маусымда елдің батыс жартысында көбінесе ыстық, ал жауын-шашын көпжылдық нормалардан төмен болады деп болжанып отыр. Маусымда Солтүстік, Шығыс Қазақстан, Ақмола, Павлодар, Қостанай, Қарағанды, Алматы облыстарының солтүстік-шығыс бөлігінде, елдің оңтүстігі және оңтүстік-шығысының таулы әрі тау-бөктерлі аумақтарында жауын-шашын мөлшері нормаға жуық болады.