Алматы облысында толассыз жауын салдарынан Кербұлақ ауданына қарасты Қоғалы және Байғазы ауылдарын су басты.

Облыстық төтенше жағдайлар департаменті баспасөз қызметінің ақпаратына сәйкес, қазір судың деңгейі төмендеген.

«Байғазы өзеніндегі су деңгейі көтеріліп, ауылдың бірнеше көшесін су басты. Су ауыл тұрғындарының бау-бақшасы мен аулаларына кірген. Сондай-ақ қатты жауын салдарынан Қоғалы ауылының бірнеше көшесі мен бір үйдің ауласын су басты. Су үйлерге кірмеген. Қазір оның деңгейі төмендеді. Зардап шеккендер жоқ. Оқиға орнында ТЖД қызметкерлері мән-жайды анықтап жатыр», - делінген облыстық ТЖД баспасөз қызметінің хабарламасында.