Алматыда таныс адамынан ақша бопсалаған қылмыстық топ ұсталды, деп хабарлады Halyq Uni тілшісі.

Қалалық ұйымдасқан қылмысқа қарсы күрес басқармасының қызметкерлері күдіктілерді жәбірленушіден сұраған 1 миллион теңгенің 650 мыңын алып жатқан жерінен ұстады. Олар осыдан біраз уақыт бұрын заңсыз алып кеткен көлікті қайтарып беру үшін таныс адамнан ақша бопсалаған.

Арнайы іс-шара нәтижесінде 5 ер адам ұсталды. Олардың үлкені – 35-те, кішісі – 27-де. Олар уақытша ұстау изоляторына қамалды. Аталған дерек ҚР ҚК-нің 389 бабы («Өзiнше билiк ету») бойынша тергеліп жатыр. Ұсталғандардың екеуі бұрын ҚР ҚК-нің 96-бабы («Кісі өлтіру)» және ҚР ҚК-нің 287 бабы («Браконьерлік») бойынша сотты болған, – делінген хабарламада.

Бұл жолы ұсталған кезде күдіктілерден өсімдік тектес ұнтақты зат және травматикалық тапанша тәркіленді. Көрсетілген заттар бойынша тиісті сараптамалар тағайындалды.

ҚР ҚК-нің 201-бабына сәйкес, өзге ақпарат тергеу мүддесіне орай жария етілмейді.