Абай облысы әкімдігінің ветеринария басқармасы өңірде эпизоотиялық қауіпсіздікті қамтамасыз ету жоспары аясында ветеринариялық-профилактикалық іс-шаралар мен диагностикалық зерттеулерді жүргізіп жатыр, деп хабарлады Halyq Uni тілшісі.

Бүгінде жоспарға сәйкес вакцинация 85,4%, диагностикалық іс-шаралар 72,7% орындалды. Сондай-ақ 2024 жылға арналған аса қауіпті ауруларға қарсы вакцинация мен диагностикалық зерттеулердің жоспары әзірленді.

Облыс көлемінде барлық ауыл шаруашылығы жануарлары толық бруцеллез ауруына тексерілді. Талдау нәтижесінде ірі қара мал арасында 0,4%, ұсақ мал арасында 0,06% болды.

Айта кетсек, қазіргі облыс бойынша ауыл шаруашылығы жануарларын аса қауіпті ауруларға (сібір жарасы, аусыл, нодулярлық дерматит және т.б.) қарсы вакцинациялау толық қамтылған.

Биыл облыста тұрақты эпизоотиялық қауіпсіздікті қамтамасыз ету мақсатында Үржар ауданының Мақаншы, Қабанбай, Үржар, Таскескен, Бақты ауылдарында 5 мал қорымын салу жұмыстары аяқталды. Ал Ақсуат ауданындағы Ақсуат, Екпін, Құмкөл, Қызыл кесік ауылында 4 мал қорымы салынып жатыр.

Анықтама үшін: облыста 134 ветеринариялық пункт жұмыс істейді. Елді мекендерде ветеринариялық-профилактикалық іс-шараларды жүргізу үшін 115 арнайы орын бар. Оның ішінде 15 мал бекіткіш (Абай ауданы – 1, Бесқарағай ауданы – 3, Бородулиха ауданы – 2, Үржар ауданы – 6, Семей – 3) биыл қолданысқа берілген.