Әділет министрлігінде өткен отырыста Мәжіліс депутаты Асхат Аймағамбетов әйелдер мен балалардың құқығын қорғау мәселелеріне қатысты түзетулерді таныстырды. Жаңалықтың бірі – педофилдерді өмір бойы бас бостандығынан айыру.

Біз де ұзақ таластық. Кәмелетке толмағандарды зорлағаны үшін өмір бойына бас бостандығынан айыру стандарты ұсынылып отыр. Еш баламасыз. Кәмелетке толмағандарға қатысты қылмыстар туралы хабарламағаны үшін жаңа кодекс те ұсынылды. Жақын туыстары, көршілері және басқалары баланың құқығы бұзылғанын біледі. Бірақ мұндай ақпарат көбіне жасырын қалады, - деді Асхат Аймағамбетов.

Бұл ретте кәмелетке толмағандарды зорлағаны үшін жазасын өтеп жатқан және бостандыққа шығатындар үшін өмір бойы пробациялық бақылауды енгізу де ұсынылған.

Шетелде мұндай тәжірибе бар. Мұны бізге ғалымдар да ұсынды. Түрмеден босатылатын барлық педофилдер, тіпті, пробациялық бақылау аяқталып, соттылығы жойылғаннан кейін де, қалған уақытында пробациялық бақылауда болуы керек деп санаймыз. Тұрғылықты жерін, жұмыс орнын ауыстырса, барлығы тиісті органдардың бақылауында болуы керек, - деді депутат.

Ал сарапшылардың пайымдауынша, заңдарды өзгерту жеткіліксіз, оны орындау қажет.

Еске сала кетсек, бұған дейін 32 педофилге химиялық кастрация жасалғанын жазған болатынбыз. Алайда бұл жолы Қазақстанда педофилдерді олай мәжбүрлеп емдеу тәртібін өзгерту де қарастырылды. Атап айтқанда, отырысқа қатысқандар препаратты жазалау кезеңінде емес, босатылғанға дейін енгізуді бастау қажеттігін алға тартты.