Павлодар облысында амнезиямен ауыратын қарт әйел 6 күн бойы іздестіріліп жатыр, деп хабарлады Halyq Uni тілшісі.

Полиция қызметкерлерінің мәліметінше, Надежда Костынюк 1949 жылы туған. Ол 4 қарашада үйден шығып, әлі оралмаған. Қай жерде екені белгісіз. Әйел амнезиямен ауырады, яғни мезгіл-мезгіл есте сақтау қабілетін жоғалтады. Бұған дейін де үйден кетіп қалып жүрген.

4 қарашадан бастап полиция қызметкерлерінен басқа іздестіру іс-шараларына ТЖД қызметкерлері, кинологиялық қызмет, «Vita» еріктілері және ауыл тұрғындары жұмылдырылды. Іздеу үшін ұшу аппараттары (дрондар) мен тікұшақ қолданылып жатыр, - деді Павлодар облысы Успен ауданы полиция бөлімінің бастығы Асқар Аралбаев.

Бұл аймақта Ресейге апаратын жолдар жақын, сондықтан полицейлер әйелді Павлодар облысынан тыс жерлерге шығуы мүмкін деп ойлайды. Әйелдің киімі: сары күрте, басында қызыл түсті, тоқылған қалпақ, резеңке галош.

Жоғалған Костынюк Надежда Ивановнаның орналасқан жері туралы қандай да бір ақпарат білген адамның полицияға 102 телефоны бойынша хабарлауы қажет.