Қазақстанда қолданыстағы спорт жүйесін жаңғырту жоспарлануда – заң жобасы

Туризм және спорт вице-министрі Сәрсен Құранбектің төрағалық етуімен Ұлттық олимпиада комитеті, Ұлттық паралимпиада комитеті, Ұлттық сурдлимпиада комитеті, Ұлтты спорт түрлері қауымдастығы, спорт федерациялары, жергілікті атқарушы органдар өкілдерінің қатысуымен «Қазақстан Республикасының кейбір заңнамалық актілеріне дене шынықтыру және спорт мәселелері бойынша өзгерістер мен толықтырулар енгізу туралы, сондай-ақ нормалардың шамадан тыс (шамадан тыс) заңнамалық регламенттелуін болдырмау туралы» дене шынықтыру және спорт саласындағы заң жобасы талқыланды.

Жобаны қабылдаудың мақсаты – дене шынықтыру және спорт субъектілерінің қызметін ретке келтіру, оларды нәтижеге қайта бағдарлау және жоғары көрсеткіштерге қол жеткізу.

Өзгерістер ұлттық командалардың Олимпиадалық, Паралимпиадалық, Сурдлимпиадалық, Азиялық және Паразиялық ойындарда, сондай-ақ ұлттық спорт түрлерінде өнер көрсету нәтижелеріне сүйене отырып, басым спорт түрлері бойынша республикалық және жергілікті деңгейде мемлекеттік қаржыландыру мәселелерін қозғайды.

Заң жобасында мынадай өзгерістер мен толықтырулар көзделеді:

• «жоғары жетістіктер спорты», «спорт резерві», «спорттың басым түрлері» ұғымдарын нақтылау»;
• дене шынықтыру және спорт субъектілерінің тізбесін кеңейту;
• Республикалық және өңірлік аккредиттелген спорт федерациясынан Олимпиада хартиясының 28-тармағының 2.1) тармақшаларына сәйкес ұлттық спорт федерациясы мәртебесіне өзгерту;
• спорт түрлерін саралауды алып тастау;
• бұқаралық және балалар-жасөспірімдер спортын дамытуға қаражатты қайта бағдарлау мақсатында кәсіби спорт клубтарын ұстауға арналған лимиттерді бекіту;
• спорт түрлерімен айналысу үшін ең төменгі жасты бекіту.

Сондай-ақ дене шынықтыру және спорт саласындағы уәкілетті орган мен жергілікті атқарушы органдарға бірқатар қосымша функциялар беру көзделген.

Жалпы, талқылауға қатысушылар, спорт жұртшылығы, жергілікті атқарушы органдар заң жобасын қолдады, ұсыныстар берілді, оларды уәкілетті орган қарайды.