Бүгінде Қазақстанда 8 мыңнан аса медициналық маман жетіспейді. Бұл туралы Сенат төрағасы Мәулен Әшімбаев айтты, деп хабарлады Halyq Uni тілшісі.

Оның пікірінше, қазір медицинада кадр тапшылығы өзекті мәселе болып саналады. 

Денсаулық сақтау қызметкерлерінің жалақысы жыл сайын 20-30% артып отыр. Бұл – медицина қызметкерлерін әлеуметтік қорғауда өте үлкен маңызға ие. Алайда салада медициналық кадрдың тапшылығы бар. Біздің мәлімет бойынша денсаулық сақтау саласында 8 мыңнан аса кадр тапшы. Бұл тенденция соңғы жылдары байқалып отыр. Оның саны артып та келеді. Кадрларды сақтап, оларға жағдай жасау бойынша бірқатар ұсыныс болды, - деді Мәулен Әшімбаев Сенаттың жалпы отырысында.

Осы орайда ол осы бағытта Денсаулық сақтау министрлігімен бірлесіп жұмыс істеуді ұсынды. 

«Медицина мамандығына кадр тарту үшін қосымша қандай іс-әрекет жасауға, қандай заңға өзгеріс енгізіп, қандай норма қабылдауға болады деген мәселелерді қарау керек. Себебі медицина кадрларының жетіспеушілігі – өте өзекті проблема. Соңғы жылдары қарқынды өсу болған жоқ. Қазір нақты шешім қабылдауды қажет ететін жағдай туындап отыр. Оларды әзірлеп, Үкіметпен бірлесіп іске асырамыз», - деді Сенат төрағасы.