Шымкентте ауа райының қолайсыздығына байланысты ескерту жарияланды, деп хабарлады Halyq Uni тілшісі.

13 қазанда күні бойы қалада қатты жаңбыр жауады. Солтүстік-батыстан жел соғып, оның күші 15-20 м/с-тен 23 м/с-ке жетуі мүмкін. Түнде 12-14 қазан аралығында ауа температурасы түнде +13-15 градустан +4-6 градусқа дейін, күндіз +23-25 градустан +9-11 градусқа дейін күрт төмендейді, - деп жазылған қалалық ТЖД қоғаммен байланыс тобы таратқан хабарламада.

Шымкент қаласы Төтенше жағдайлар басқармасының мамандары қала тұрғындары мен қонақтарын сақ болуға шақырады:

• Аулада және балконда тұрған тұрмыстық заттарды алып тастаңыз;
• Үйіңізге залалын тигізетін ағаштарды кесіңіз;
• Көлікті гаражға, ол болмаса, қауіпсіз жерге қойыңыз;
• Сыртта жүргенде сақ болыңыз, қауіпті жерлерден айналып өтіңіз;
• Құлағалы тұрған ағаштардан және әртүрлі нысандардан (көпірлер, эстакадалар, құбырлар, электр желілері, ықтимал қауіпті өндірістік нысандар) аулақ жүріңіз.