Әділет министрі Азамат Есқараев алиментті өндіріп алу мәселесі өте күрделі екенін жеткізді.

«Рас, алимент төлемеу мәселесі бар. Ол көптеген қиындыққа әкеп соғады. Алимент төлемеу салдарынан бала-шаға тиісті деңгейде қамтамасыз етілмейді, олардың жағдайы нашар, уақытында тамағы болмайды әрі киімі бүтін емес. Осылайша, әлеуметтік мәселе туындайды», - деді Азамат Есқараев.

Министр 6 мың адам алимент төлемей жүргенін айтты.

Қазір өндірісте 303 мың іс қаралуда. Оның ішінде 13 316 іс бойынша мәселе шешілмей, қиындық туып жатыр. 6072 адам нақты алимент төлемей жүр. Бүгінде 7 219 борышкерге шетелге шығуға тыйым салынған. Қазір жалпы алимент бойынша қарыз – 7 млрд теңге, - деді басшы.

Журналист министрге: «Алиментті көбінесе кімдер төлемейді? Ерлер ме, әлде әйелдер ме?» – деп сұрағын нақтылады.

«Біз мәселені гендерге бөлмейміз. Біз мәселеге «борышкерсің бе, қарызың бар ма?» деп қараймыз. Оның тегіне, ұлтына, нәсіліне, жынысына қарамаймыз. Әрине, (алимент төлемей жүргендердің арасында – автор) әйелдер де бар шығар», - деді Азамат Есқараев.

Halyq Uni тілшісі Әділет министрлігінің баспасөз қызметіне хабарласып, бүгінде қанша әйелдің аналық парызын өтемей жүргенін нақтылап сұрады.

2022 жылдың қорытындысы бойынша, Қазақстанда 6 мың әйел алимент төлемей жүр. Биылғы деректер нақтыланып жатыр, - деді министрлік өкілі.