Коллекторлар мен қаржы ұйымдарына шағымданушылар азайған

2023 жылғы шілдеде Қаржы нарығын реттеу және дамыту агенттігі банктердің, микроқаржы ұйымдарының, коллекторлық агенттіктердің, сақтандыру және бағалы қағаздар нарығы субъектілерінің қызметіне байланысты жеке және заңды тұлғалардың 4 193 өтінішін қарады, бұл 2023 жылғы маусыммен салыстырғанда 15,9% аз, деп хабарлайды агенттіктің баспасөз қызметі.

Өтініштердің 50,0%-ы банк секторына тиесілі. Микроқаржылық қызметті жүзеге асыратын ұйымдардың қызметі мәселелері бойынша өтініштер өтініштердің жалпы санының 23,0%-ын, коллекторлық агенттіктердің 6,0%-ын, сақтандыру нарығы субъектілерінің 2,0%-ын, өзге ұйымдардың 17,5%-ын, қаржы ұйымының атауын көрсетусіз 1,5%-ды құрады.

Агенттік 2023 жылғы шілдеде 6 ұсынымдық қадағалап ден қою шарасын, 5 жазбаша ұйғарым, 1 жазбаша ескерту, әкімшілік құқық бұзушылықтар туралы 13 хаттама бойынша 4,6 млн теңге жалпы сомаға 13 әкімшілік жаза қолданды, оның ішінде:

• банктерге – 5 ұсынымдық қадағалап ден қою шарасы және әкімшілік құқық бұзушылықтар туралы 2 хаттама бойынша 1,2 млн теңге жалпы сомаға 2 әкімшілік жаза;
• банк операцияларының жекелеген түрлерін жүзеге асыратын ұйымдарға – әкімшілік құқық бұзушылықтар туралы 2 хаттама бойынша 799 мың теңге жалпы сомаға 2 әкімшілік жаза;
• сақтандыру (қайта сақтандыру) ұйымдарына – 1 ұсынымдық қадағалап деп қою шарасы және әкімшілік құқық бұзушылықтар туралы 1 хаттама бойынша 345 мың теңге жалпы сомаға 1 әкімшілік жаза;
• коллекторлық агенттіктерге – 3 жазбаша ұйғарым, әкімшілік құқық бұзушылықтар туралы  5 хаттама бойынша 1,0 млн теңге жалпы сомаға 5 әкімшілік жаза;
• микроқаржылық қызметті жүзеге асыратын ұйымдарға – 2 жазбаша ұйғарым, 1 жазбаша ескерту, әкімшілік құқық бұзушылықтар туралы 3 хаттама бойынша 1,2 млн теңге жалпы сомаға 3 әкімшілік жаза қолданды.