Алматы мектептерінде 27 500 балаға орын жетпейді. Бұл туралы қаланың білім басқармасы Halyq Uni ресми сауалына берген жауабында мәлімдеді.

2023 жылдың 1 тамызындағы жағдай бойынша оқу орындары тапшылығы – 27 500 орын. Биыл 5 570 орынға лайықталған 11 нысанды іске қосу жоспарланған, оның ішінде 1 қыркүйекке дейін 1 500 орынға лайықталған бір мектептің құрылысы аяқталады. Сондай-ақ 3 150 балаға арналған 6 жекеменшік мектеп ашу жоспарланған, - делінген басқарма ұсынған ақпаратта.

Қалада «Жайлы мектеп» ұлттық жобасы аясында 37 100 орынға арналған 22 мектеп салынады деп жоспарланған.

«Алматыда үш ауысымды мектеп жоқ. 2022 жылы бір апатты мектеп (№59) болды. Биыл мектепте күрделі жөндеу жұмыстары басталды», - делінген ақпаратта.

Қалада бірқатар пән бойынша маман тапшылығы бар. Олар:

• Математика – 103;
• Бастауыш сынып – 93;
• Орыс тілі – 62;
• Информатика – 52;
• Физика – 50;
• Қазақстан тарихы – 47;
• Шет тілі – 42;
• Қазақ тілі – 37;
• Химия – 33;
• Музыка – 32;
• География – 31;
• Биология – 23;
• Дене шынықтыру – 14.