Ақмола облысының тұрғыны белгіленбеген жерден өткен жеткіншекті қағып кетті, деп хабарлады Halyq Uni тілшісі.

Полиция қызметкерлерінің мәліметінше, 16 тамызда 11:04-те Көкшетау қаласы полиция басқармасы ЖБО-ның қырағы инспекторлары бейнебақылау камерасы арқылы Пушкин көшесіндегі №6 үйге қарама-қарсы Бамбино дүкенінің жанында кәмелетке толмаған баланы автокөлік қағып кеткенін байқаған. Олар бұл ақпаратты дереу осы ауданды күзететін полицейлерге берген.

Оқиға орнына келген тәртіп сақшылары СҚО-ның 32 жастағы тұрғыны Toyota Land Cruiser көлігімен жолда белгіленбеген жерден өтіп бара жатқан 16 жастағы жасөспірімді қағып кеткенін анықтаған.

Жол-көлік оқиғасы салдарынан жеткіншек жергілікті облыстық балалар ауруханасына «Оң жақ бұғанасының жабық сынуы, аяқ жіліншігінің орнынан қозғалуымен ашық сынуы» диагнозымен жеткізілді, – делінген хабарлада.

Осы фактіге қатысты полицейлер ҚР ҚК-нің 345-бабы 2-бөлігі («Көлік құралдарын басқаратын адамдардың жол жүрісі немесе көлік құралдарын пайдалану ережелерін бұзуы») бойынша сотқа дейінгі іс жүргізуді бастады.