Еңбек және халықты әлеуметтік қорғау министрлігі Еңбек және әлеуметтік қорғау комитетінің мәліметіне қарағанда, биыл екінші тоқсанның қорытындысы бойынша өндірістегі жазатайым оқиғалардан 640 жұмысшы зардап шегіп, оның 69-ы қаза тапқан. Бұл – өткен жылғы осы кезеңмен салыстырғанда, 4% аз көрсеткіш.

Еліміздің өндірістік аймақтарында жарақат алып жатқан жұмысшылар азаяр емес. Мәселен, Қарағанды облысында – 79, ШҚО-да – 53, Абай облысында – 50, Павлодар облысында – 46, Қостанай облысында – 44, Ақтөбе облысында – 40 адам зардап шеккен. Сондай-ақ Алматы қаласында 50 адам жарақат алған.

Экономиканың салалары бойынша ең көп зардап шеккендер тау-кен металлургия кешенінің өнеркәсіптерінде тіркелген. Мұнда жұмысшылардың 21,8%-ы, ал құрылыс саласында құрылысшылардың 10,6%-ы жазатайым оқиғадан зардап шеккен.

Жазатайым оқиға негізгінен абайсызда болып жатады. Қолда бар дерекке қарағанда, жұмысшылардың 33,3%-ы – сол абайсызда жарақат алғандар. Сосын жазатайым оқиға өндірістегі жұмыстың тиісті деңгейде ұйымдастырылмауынан да (27,1%) болады. Еңбек қауіпсіздігі және еңбекті қорғау (9,3%), жол қозғалысы ережелерін бұзу (8,4%) сияқты нәрседен де адам зардап шегеді деген дерек бар.