Ақмола облысының полицейлері Өзбекстанның 43 азаматына жұмыс берген Қазақстан Республикасының азаматын анықтады.

Бұл ретте шетел азаматтары ӘҚБтК-нің 517-бабы 5-бөлігі («Шетелдiктiң немесе азаматтығы жоқ адамның Қазақстан Республикасының халықтың көші-қоны саласындағы заңнамасын бұзуы») бойынша әкімшілік жауапкершілікке тартылған.

Ал уәкілетті органның рұқсатынсыз шетелдік жұмыс күшін пайдаланғаны үшін жұмыс берушіге қатысты ҚР ӘҚБтК-нің 519-бабы («Шетелдiк жұмыс күшiн және еңбекшi көшiп келушілерді Қазақстан Республикасының заңнамасын бұза отырып тарту») бойынша хаттама толтырылды, – делінген ІІМ баспасөз қызметі таратқан хабарламада.

Бұдан бөлек, 3 шілдеде Алматы облысында Тәжікстанның 2 азаматын өлтірді деп күдікке ілінген шетел азаматы ұсталды. 26 маусымда Қарасай ауданының полиция басқармасына жеке үйлердің бірінен пышақ жарақаты бар 2 ер адамның мәйіті табылғаны туралы хабарлама түскен. Ведомство өкілдерінің мәлімдеуінше, олар Тәжікстан Республикасының 30 бен 34 жастағы азаматтары болған.