Денсаулық сақтау министрі Алексей Цой әлемдегі эпидемиологиялық жағдайды ескере отырып, Иммундау жөніндегі ұлттық консультативтік комиссия халықты ревакцинациялау тактикасын қайта қарағанын мәлімдеді.

8 желтоқсаннан бастап 6 айдан кейін вакцинацияның екі дозасын алған адамдардың бәрі, сондай-ақ коронавируспен ауырған адамдар ревакцинацияланады. 

Бүгінде Қазақстан бойынша 44 702 адам ревакцинациядан өтті.

Айта кетейік, 15 қарашада ҚР Бас санитар дәрігерінің COVID-19 инфекциясына қарсы ревакцинация жүргізу туралы қаулысы жарияланды.

Құжатта КВИ-ге қарсы ревакцинацияға жататын халықтың тәуекел топтары көрсетілген. Науқан екі кезеңнен тұрады. Осыған дейін вакцинаның екі дозасын да салдырғандар жаңа жылға дейін үшіншісін (ревакцинация) қабылдайды. Бұл медицина қызметкерлері, мұғалімдер, медициналық-әлеуметтік мекемелер мен жабық балалар мекемелерінің мамандары, сондай-ақ күш құрылымдарының қызметкерлері.

Елімізде 8,8 миллионнан астам адам коронавирусқа қарсы вакцинаның 1-компонентін алды. Екінші доза 8,2 миллионнан астам адамға салынды.

Қазіргі таңда 128 174 жасөспірім, 31 747 жүкті және бала емізетін әйел Pfizer вакцинасының бірінші дозасын салдырды. Екінші дозаны 5 592 адам алды.