×

Астанада 9-қабаттан секірмек болған адамды құтқарғандар марапатталды

Оқыс оқиға Байтұрсынов көшесінде болған

 Дәурен Ерболат 06.06.2023 | 17:26
Фото: polisia.kz

Елордада 9-қабаттан секірмек болған адамды құтқарған полицейлер мен тұрғын марапатталды, деп хабарлады Polisia.kz.

Астана қаласы полиция департаментінің басшысы Марат Төлебаев оларды грамотамен марапаттады.

Полицияға тұрғын хабарласып, ер адамның 9-қабаттан секірмек болғанын айтып көмек сұраған. Оқиға орнына Алматы ауданының УПП-5 учаскелік полиция инспекторлары Мавлон Аманқұлов пен Азамат Төребай дереу жеткен. Олар тұрғын үйге жеткенде балконда тұрған ер адамның секіруге әрекет жасағанын көрген. Полицейлер 9-қабатқа тез көтеріліп, онымен сөйлесіп, райынан қайтаруға тырысқан. Бірақ ер адам айқайлап, жанына ешкімді жолатпаған.

Содан кейін тәртіп сақшысы өздеріне көмектескісі келген сол үйдің тұрғыны Ақан Хамидуллинмен бірге 8-қабаттың балконынан ер адамды ішке итеріп кіргізген. Осы сәтте 9-қабаттағы учаскелік инспектор секірмек болған адамды тез ішке қарай тартқан.

Құтқарылған 36 жастағы ер адамға психологиялық көмек көрсетілді.

Астана қаласының полиция департаменті Ақан Хамидуллинге алғыс айтты.

Серіктес жаңалықтары

Сараптама