Мәжіліс депутаты Ринат Зайытов жолаушыларға қазақтың ұлттық аспабы домбыраны ұшаққа алып кіруге рұқсат беруді талап етті, деп хабарлады Halyq Uni тілшісі.

Депутат сұрағын Индустрия және инфрақұрылымдық даму вице-министрі Азамат Бейісбековке қойды.

Өзіңіз де әлеуметтік желіден көрген шығарсыз. Біріншіден, қазір әуе компанияларында қазақтың ұлттық аспаптарына қарсы, әдейі бір жоспар құрып жатқан сияқты. Домбыраның ішінде бірде-бір металл жоқ. Оның құрамында қойдың ішегі мен қарағайдың ағашынан басқа ештеңе жоқ. Оның ешқандай зияны жоқ, - деді депутат Мәжілісте өтіп жатқан Үкімет сағатында.

Ринат Зайытов қазақтың ұлттық аспабын ұшаққа кіргізуді талап етті.

«Нағыз қазақ – қазақ емес, нағыз қазақ – домбыра» деп ақын Қадыр Мырза Әлі айтпақшы, бұл – мемлекетіміздің айнасы. Әуе компанияларына дұғай-дұғай сәлем айтыңыз. Мәселені қалай болса да шешіп беріңіздер. Қазақта өзі 4-5 ұлттық аспап бар. Оларды ұшаққа кіргізуге рұқсат беріңіздер. Егер рұқсат берілмесе, қолдарыңыздан келмесе, онда Астана мен Алматы әуежайына жоқ дегенде мың домбырашыны қойып, Адай күйін орындап, жалынып сұрайық», - деді ол.

Бұған дейін айтыскер ақын Айшолпан Тілеутай Fly Arystan бортсеріктері ұшаққа добырасымен бірге кіруге рұқсат бермей қойғанын айтқан еді.