Түркістан облысында 14 жастағы жасөспірім ит тістегеннен кейін бір жылдан соң қайтыс болды. Өлім себебі «құтырма ауруы» деп болжанып отыр.

Ата-анасының айтуынша, өткен жылғы мамырда баланың аяғын ит тістеп алған. Алайда олар медициналық көмекке жүгінбеген. 

Бір жыл өткен соң, 7 сәуірде жасөспірімде дене температурасының жоғарылауы, жарақат алған жердің ауырсынуы, әлсіздік сияқты клиникалық белгілер пайда болған. Дәрігерлер оған сүйек ауруына қарсы емдеу тағайындаған.

Тексеру өткеннен соң жасөспірімде бүйректің қабынуы анықталып, соған сәйкес ем алған. Бірақ беті бері қарамаған.

Жағдайы күрт нашарлаған баланы 10 сәуірде жедел жәрдем аудандық ауруханаға апарып, жұқпалы аурулар бөлімінде оған «құтырма» диагнозы қойылған. 11 сәуір күні оқушы көз жұмды.