Соңғы 5 жылда өндірісте зардап шеккендердің саны 6,5%, қаза тапқандар саны 8,4% азайды, деп хабарлады Halyq Uni тілшісі.

Еңбек және халықты әлеуметтік қорғау министрлігінің мәліметінше, Қазақстанда жыл сайын кәсіпорындарда 1500-ден аса жазатайым оқиғаға жол беріледі, оның 200-ге жуығы өліммен аяқталады.

Экономика салалары бөлінісінде зардап шеккендердің ең көп саны тау-кен металлургия кешенінің кәсіпорындарында – 16,2%, құрылыс саласында – 15% байқалады.

Қазір 386 мыңнан аса жұмысшы зиянды және қауіпті еңбек жағдайларында жұмыс істейді. Шу мен діріл деңгейінің жоғарылауы жағдайында әрбір екінші (46,8%), жұмыс аймағының газдануы мен шаңдануының жоғарылауы жағдайында әрбір үшінші (33,2%) және қолайсыз температура режимінде әрбір алтыншы (16,7%) адам жұмыс істейді. Ауыр дене еңбегімен 102,7 мың (6,1%) жұмысшы айналысады.

2022 жылы 680 мың қызметкер зиянды еңбек жағдайларында жұмыс істегені үшін түрлі өтемақы алды. Осы мақсаттарға жұмыс берушілер 207,6 млрд теңге бөлді, бұл – 2021 жылмен салыстырғанда 24% артық.

Саламатты және қауіпсіз еңбек жағдайларын одан әрі қамтамасыз ету үшін Еңбек және халықты әлеуметтік қорғау министрлігі шаралар кешенін қабылдап жатыр.

2022 жылдың қорытындысы бойынша еңбек қауіпсіздігі және еңбекті қорғау саласындағы бұзушылықтар үшін 119 лауазымды адам атқаратын лауазымынан босатылды. Құқық қорғау органдарына жазатайым оқиғалар бойынша 1094 материал жіберілді. Олар бойынша 192 қылмыстық іс қозғалды. Жұмыс орындарында еңбек жағдайларының нақты жай-күйін бағалау мақсатында 7061 өндірістік нысанды аттестаттау өткізілді.

Бұзушылықтардың алдын алу және болдырмау мақсатында еліміздің 3 211 кәсіпорны еңбек қауіпсіздігі және еңбекті қорғау стандарттарын енгізді.

2019 жылдан бастап «Нөлдік жарақат – Vision Zero» тұжырымдамасын ілгерілету бойынша жұмыстар белсенді жүргізіліп жатыр. Бүгінде оған 425 кәсіпорын қосылды.

Ведомство алдына еңбек жағдайлары зиянды жұмыс орындарын едәуір қысқарту және өндірістік жарақаттану деңгейін төмендету міндетін қояды. Осы мақсатта 2025 жылға дейін қауіпсіз еңбекті қамтамасыз ету жөніндегі іс-қимыл жоспары іске асырылады. Онда өндірістік жарақаттанудың алдын алу, өндірістегі жазатайым оқиғалардан міндетті сақтандыру тетігін жетілдіру, зиянды еңбек жағдайлары бар жұмыстарда істейтін қызметкерлерге кепілдіктер берудің тәуекелге бағдарланған тетігін енгізу көзделеді. Осы іс-шараларды іске асыру нәтижесінде 2025 жылға қарай жазатайым оқиғалар жиілігінің коэффициентін 1 мың жұмысшыға 0,20-ға дейін төмендету, зиянды еңбек жағдайларында жұмыс істейтін жұмысшылардың үлес салмағын 20%-ға дейін қысқарту күтіледі.

Әлеуметтік серіктестермен бірлесіп, жыл сайын «Қауіпсіз еңбек» ақпараттық науқаны өткізіледі.

Биыл 24-26 мамырда жоспарланған еңбекті қорғау және өнеркәсіптік қауіпсіздік жөніндегі дәстүрлі Конференция мен Көрме халықаралық еңбекті қорғау күніне орайластырылған.