Бірнеше қазақстандық Украинадағы соғысқа қатысты деген күдікке ілінген. Істі Ұлттық қауіпсіздік комитеті тергеп жатыр.

ҰҚК Қазақстан азаматтарының Украина аумағындағы соғыс қимылдарына қатысу фактілері бойынша 10 қылмыстық істі тергеп жатыр, - делінген ҰҚК-нің «Курсив» жолдаған ресми сауалға берген жауабында.

Қылмыстық іс жүргізу кодексінің 201-бабына сәйкес, сотқа дейінгі тергеп-тексеру деректері жария етуге жатпайды.

Еске сала кетсек, 2022 жылғы 17 маусымда президент Қасым-Жомарт Тоқаев Санкт-Петербург форумының пленарлық отырысында Владимир Путинмен бірге сөйлеген сөзінде Қазақстан Украинадағы «квазимемлекеттік аумақтардың» тәуелсіздігін мойындамайтынын айтқан болатын.