Оның осы уақытқа дейін неге табылмай жүргені белгілі болды
Полицейлер іс-түссіз жоғалып кеткен Өзбекстан азаматшасын Нұр-Сұлтанда тапты.
Тәртіп сақшылары астана аумағында рейдтік іс-шаралар жүргізу барысында жоғалып кеткен Өзбекстанның 39 жастағы азаматшасын тапты. Оны көрші елде тұратын туғандары 2008 жылдан бері іздеп жүргені анықталды, – дейді қалалық полиция департаменті.
Іздегендердің айтуынша, ол Алматыға жұмысқа келген. Содан кейін ұзақ уақыт Шымкент және Қызылорда қалаларында жұмыс істеген. Ал табылған әйелдің мәліметінше, ол құжаттарын жоғалтып алған әрі туыстарымен байланысқа шыға алмаған. Ол осы жылдар ішінде үй шаруасынан бастап, үй-жайлар мен кафелерді тазалау сияқты кезіккен жұмыстың бәрін істеп келген. Содан 2021 жылғы шілдеден бастап бас шаһарда жалдамалы пәтерлерде тұрған.
Көші-қон қызметкерлері Өзбекстан азаматшасына уақытша құжат берді. Әйел бір ай ішінде Қазақстаннан кедергісіз кетіп, Отанына орала алады.