Тәжікстанда Украинадағы соғысқа Ресей әскері құрамында қатысып, қаза тапқан азамат жерленді. Бұл туралы rast.kz хабарлады.

«Озоди» радиосынан мәлімет алған сайттың хабарлауынша, ол Ресей түрмесінде жазасын өтеп жатқан 48 жастағы Ислом Саидмуродов деген азамат болған. Оның жаназасы 23 наурыз күні Нурек қаласындағы Пули Сангин қышлағындағы үйінен шығарылыпты.

Ислом Саидмуродов 2005 жылы заңсыз есірткі тасымалын жасағаны үшін сотталып, Ресей түрмелерінің бірінде жазасын өтеп жүрген. Марқұмның інісі Курбонали Саидмуродовтың айтуынша, туған-туысқандары Исломның Украинадағы соғыста жүргенін білмеген.

Ол соңғы рет бізбен былтыр қарашада хабарласты. Бірақ өзінің қайда жүргенін айтпады, – деді ол.

Тәжікстан азаматының қайда және қандай жағдайда қаза тапқаны туралы дерек жоқ. Артында 3 баласы қалды.