Былтыр 22 мыңнан аса адам Қазақстан азаматтығын алды. Бұл туралы Ішкі істер министрлігі хабарлады.

Ведомствоның апталық брифингінде еліміздің азаматтығын жыл сайын 20 мыңға жуық адам алғысы келетіні айтылды.

ІІМ-нің хабарлауынша, еліміз тәуелсіздік алған кезден бері Қазақстан азаматтығын 1 миллионнан аса адам алған. Былтыр  22 мың адам ел азаматы атанды. Президенттің жарлығымен 1 375, жеңілдетілген тәртіппен 20 мыңнан аса адам азаматтық алды. Оның ішінде 17,5 мыңнан астамы қандас (17 676), Қазақстан, Беларусь, Қырғызстан және Ресей арасындағы азаматтыққа қабылдаудың жеңілдетілген тәртібі туралы келісім бойынша 1 287, тұрмысқа шыққан әйелдің азаматтығы туралы конвенция бойынша 1 777 адам Қазақстан азаматы болды.

ІІМ БҰҰ БЖКБ-ның Қазақстандағы өкілдігімен және ҮЕҰ-мен бірлесіп, екі жыл ішінде құжатсыз және азаматтығы белгісіз адамдарды анықтау және тіркеу бойынша кең ауқымды акция өткізді. Акция нәтижесінде азаматтығы, құжаттары жоқ 8 мыңнан аса адам анықталды. Оның ішінде 5 мың адам Қазақстан азаматы екенін айтты. Олардың жеке куәліктері рәсімделді. 3 мыңнан аса адамға азаматтығы жоқ адамның куәлігі берілді.