Алматыда ерлі-зайыптылар жаңа туған сәбиін 2 миллион теңгеге сатпақ болған. Екеуі қылмыс үстінде ұсталды, деп хабарлады Polisia.kz.

Арнайы жасақ Алмалы ауданында 25 жастағы әйел мен оның 32 жастағы күйеуін ұстады. Жас келіншек перзентханадан шыққан бойда бірден «клиентіне» 2 миллион теңгеге келісім жасасуға барған.

Ерлі-зайыпты баланы тумай жатып, сатып алатын адам іздеген. Ұстау кезінде нәрестені сатудан түскен ақша тәркіленді. Екеуі өз кінәсін толығымен мойындап отыр, - делінген хабарламада.

Қазір Қылмыстық кодекстің 135-бабы 2 бөлігі («Кәмелетке толмағандар саудасы») бойынша сотқа дейінгі тергеу шаралары басталды.

Айта кетсек, осы қылмыс үшін 9 жылдан 12 жылға дейінгі мерзімге бас бостандығынан айыру жазасы қарастырылған.